اعلانات الهيدر – بجانب اللوجو

Al Masalla-News- Official Tourism Travel Portal News At Middle East

جانبى طويل
جانبى طويل

نزيف الجنيه يستنزف دم الغلابه بقلم: اشرف سركيس

 

نزيف الجنيه يستنزف دم الغلابه بقلم: اشرف سركيس

  
بقلم : اشرف سركيس

فى ايه وايه اللى بيحصل وايه اللى ودى الجنيه بتاعنا فى داهيه ويا دوب فى يومين  وكل يوم سعره بيتنيل على عينه والحكومه لا حس ولا خبر .

وسمعت انه وصل الى ادنى قيمة له  من سنين كتيرة فاتت وانه انخفض قدام الدولار ب10% وان مصر على حافة الافلاس واننا مش هنلاقى مرتبات الموظفين ولا معاشات العواجيز ولا قمح رغيف عيش الغلابه مع نهاية مارس اللى جاى.

 
ويطلع الريس فى مجلس الشورى ويطمنا ان الدنيا كويسة وبخير وان مصر عمرها ما هتفلس  وان مفيش حاجه اسمها بلد تفلس.

 
وبعديها بساعتين نلاقى اكتر من  خبير اقتصادى فى البرامج الفضائية يقول مصر هتفلس وان الاقتصاد دخل مرحله الموت السريرى وانه فى حاجة لمعجزة عشان ينهض ويتعافى وان الريس بيهيس وبياكل بعقلنا حلاوة.

 ونسمع عن استقالة العقدة بتاع البنك المركزى وبعدين نسمع ان العقدة اتفكت  وانه مش هيستقيل وبعدين نسمع ان فى تعديل وزارى وبعدين نلاقى مفيش تغيير والبورصة عندنا  يا حول الله عيانة ومرضانة وواخدة برد فى مفاصلها طول السنه وصدرها حساس وعندها التهاب رئوى وربو مزمن وطبعا بسرعه  بتنهار مع كل هذه التوترات واسهمها بتنزل سابع ارض  ومعاها خسائر بالملايين وخراب بيوت شركات ومساهمين.

 
ده كمان مع الحوادث اللى نازلة ترف من كل شكل ولون  مع بداية السنه الجديدة فمن اقتحام شركة صرافة بشرم الشيخ على حوادث فى المترو والسكة الحديد  على سطو مسلح  وسرقة ربع مليون جنيه من مركز قومى على خطف الناس وطلب الفدية على سرقة السيارات وترويع الاهالى على اللغط السياسى الموجود فى الشارع واللى كان سبب رئيسى فى اللى احنا فيه .

وانا لا اقتصادى ولا خبير مالى انا راجل بسيط ومعلوماتى على قدى ولا  عمرى افهم فى الكلام المعقد زى التضخم والاحتياطى والبنك الدولى  ولا فى الارقام ولا البيانات ولا المؤشرات.

 
بس بعقلى البسيط وبالمفهومية كده  لما الدولار يعلى والجنيه سعره ينزل يبقى كل حاجة هتغلى معاه لان اكتر من 65% من  حاجتنا واحتياجتنا بنستوردها   ده بالاضافة لان مفيش دولارات ولا اى نقد اجنبى متوفر دلوقتى لان السياحهة هربت والانتاج والتصدير الله يرحمهم   واول حاجه  هتغلى هيكون رغيف العيش لان القمح بنستوردة ولما رغيف العيش يغلى يبقى كل حاجة هتغلى معاه حتى لو مكناش بنستوردها.
 
وطبعا طبق الفول وسندوتش الطعمية مسماربطن الغلابة هيغلى  ومعاه اجرهة الميكروباص وفاتورة الكهرباء وانبوبة الغاز وعلبة السجائر مزاج الغلابة.

 

 انا تايه ومش عارف  اروح فين واعمل ايه واتصرف ازاى ويا ترى الحق اشترى رز ومكرونة وقمح  وسكر واخزن قبل  ما اسعارها تولع نار او منلقهاش فى السوق من اساسه ولا اتوكل على الله واسد ودانى واعمل عبيط
والله اللى  هيدفع تمن انهيار الجنيه طبقة الغلابة والطبقة المتوسطة اللى كانت عايشة يا دوب مستورة ومكفية نفسها بالعافية .

اللى هيدفع تمن الخلافات السياسية والاعتصامات والاضرابات والوقفات الاحتجاجيه  الطبقه المطحونه البسيطه من الشعب .

اللى هيدفع تمن الانفلات الامنى طبقه الغلابة اللى راضية وعايشة وبتحمد ربنا كل وقت وكافية خيرها شرها.

 
بس والله اتقوا شر الحليم اذا غضب ولو الشعب البسيط  طلع من هدومه وخرج للشارع هتبقى ثوره جياع هتاخد معاها الاخضر واليابس.
يا ناس يا هوه الحقونا والحقوا مصر قبل ما ناكل بعضنا
 

نبذة عن الكاتب

مقالات ذات صله

error: Disabled
%d مدونون معجبون بهذه: